+

MII DÁRBBAŠIT FILMMAID SÁMI NUORAIDE JA -MÁNÁIDE

Internašunála Sámi Filbmainstituhtta lágida kurssa filbmagiehtačálliide, geain lea beroštupmi čállit filmmaid mánáide ja nuoraide. Ulbmil lea ovdanahttit kvalitehta filmmaid giehtačállosiid sámi nuoraide ja mánáide buot šaŋŋeriin. Kursa lea eŋgelasgillii ja sámegillii ja lágiduvvo virtualálaččat.

"Filbma lea deahálaš identitehta- ja kulturguoddi, ja sámi mánát ja nuorat ánssášivčče maid buriid filmmaid iežaset gillii, sin iežaset máilmmis. Illá gávdnojit sámegielat filmmat dán jovkui ja danne ISFI dál bidjá erenoamáš fuomašumi dása ja danne bovdet ge filbmadahkkiid, geain leat buorit ideat, searvat dán deahálaš bargui", lohká ISFI Filbmakonsuleanta Liisa Holmberg.

ISFI VIRTUALÁ FILBMAČÁLLINKURSA: Mánáid- ja nuoraid filmmaid giehtačállin

Goas ja gos:
Geassemánnu 2020 - juovlamánnu 2020 - virtualálaččat ja Guovdageainnus

Oahpaheaddjit:
Amanda Kernell - beakkálmas sámi giehtačálli ja bagadalli
Kate Leys - máinnas- ja giehtačálus editor, guhte lea bargan sámi- ja álgoálbmot filbmadahkkiin jođihettiin filbmakurssaid ja logaldallamiid ISFIs 2017 rájes
Liisa Holmberg - ISFI Filbmakonsuleanta

Ulbmil: Bargat oasseváldiid filbmaideain, ovdanahttit oasseváldiid muitalusaid ja nanosmahttit sin giehtačállin gelbbolašvuođa

Boađus: Kurssa loahpas oasseváldiin lea gárvvis, nana muitalus, man sii sáhttet pitchet filbmasuorggi fágaolbmuide ja ruhtadeddjiide. Juohke oasseváldi lea ráhkadan guhkit treatment-giehtačállosa, masa sii sáhttet ohcat ISFI giehtačállindoarjaga.

Ohccan:
Ohcci galgá sáddet čuovvovaš dieđuid:
- iežas filbmaidea max. okta A4-siidu
- čilgehus, manin ohcci háliida ráhkadit dan muitalusa, bealle A4-siiddu
- čilgehus, manin dat muitalus heive bures nuoraide dahje mánáide, bealle A4-siidu

Ohcamuša galgá sáddet maŋimusta 31.5.2020 čujuhussii liisa@isfi.no

Lassidieđut
Liisa Holmberg
Filbmakonsuleanta 
liisa@isfi.no / +47 930 36 145

Govva: Hilbes biigá / 7 Sámi stories

Sosiála mediat

SEARVVA DON GE SÁMI FILBMA RÁVDNJEMII WWW.SAPMIFILM.COM