+

ORU LEA BUORET GO JOĐI - HISTORJJÁLAŠ DIGITÁLA VUOSTTAŠČÁJÁHUS

ISFI "Oru lea buoret go jođi" -filbmahástalusa trailer lea dál oaidninláhkái sosialá medias. Cuoŋománus ISFI hástalii sámi filbmadahkkiid ráhkadit oanehisfilmmaid, mat govvidit COVID-19 dili. Filbmahástalusas ledje oktiibuot 18 bagadalli ja sii ráhkadedje 15 oanehisfilmma iešguđetlágán šaŋŋeriin. Dát mearkkaša historjjálaš beaivvi Sámi filbmii; eai goassege ovdal leat almmuhuvvon ná máŋga sámi filmma ná oanehis áiggis.

"Oru lea buoret go jođi" -filbmaráiddoš lea gal duođaid mearkkašahtti olahus, Sámi filbmadahkkit leat erenoamáš bures nagodan filmmažiid ráhkadit, vaikko olles máilbmi lea leamaš giddejuvvon. Sii leat sihke humorain ja dáiddalašvuođain govvidan dán duođalaš dili. Mii illudit dassái olbmot besset geahččat dáid buriid filmmažiid", lohká ISFI Direktevra Anne Lajla Utsi. 

Oru lea buoret go jođi -filbmaráiddoš almmuhuvvo ISFI rávdnjenbálvalus Sapmifilmas bearjadaga geassemánu 5. beaivvi. Filmmaid vuosttaščájáhusa oktavuođas ISFI ávvuda Zoom-ságastallama bokte, mas leat mielde Aslak Paltto, Marja Helander ja Sara Margrethe Oskal. Ságastallan streamejuvvo ISFI Facebook-siiddus. 

Filbmaráiddoža bagadallit leat: Ann Holmgren, Aslak Paltto, Rebecca King / Ánne Mággá Wigelius, Ánne Márjá Guttorm Graven, Egil Pedersen, Ellen-Astri Lundby, Hans Pieski, Ingir Bål Nango, Joar Nango, Ken Are Bongo, Lada Suomenrinne, Liselotte Wajstedt, Marja Bål Nango, Marja Helander, Niki Rasmus, Sara Margrethe Oskal, Sergey Gavrilov ja Siljá Somby.

Govva: Sara Margrethe Oskala filmmas "Covida buriid ja bahás beivviid"

Lassidieđut:

Anne Lajla Utsi
Tel. +47 90755574

Sosiála mediat

SEARVVA DON GE SÁMI FILBMA RÁVDNJEMII WWW.SAPMIFILM.COM