+

Álgoálbmot Filbmakonferánsajulggaštus Guovdageaidnu, njukčamánnu 2018

Álgoálbmot Filbmakonferánsa mii lágiduvvui Guovdageainnus 2018:s lea stuorra lávki min ráhčamušain dan ovdii ahte álgoálbmogat miehtá máilmmi beassat muitalit iežadeamet muitalusaid, iežamet gillii ja iežamet vugiin. Filmmain ja eará mediain.

Konferánsagussiid sániiguin, geat miehtá máilmmi čoahkkánedje Sápmái, mii hálidit muitit ahte min filbma lea filbma ceavzima birra. Álgoálbmot filbmadahkkit juogadit rievtti ja ovddasvástádusa muitalit min historjjá. Vai mii sáhttit govvidit min vássánáiggi, muitalit duohtavuođa min otná dilis ja govahallat min boahtteáiggi filmmaid muitaleami bokte. Ja mii leat gievrabut go mii leat ovttas.

• Álgoálbmot Filbmakonferánsa oktavuođas mii cealkit min čanastumi dahkat Árktalaš Álgoálbmot Filbmafoandda iešheanalaš ruhtadan-, ovttasbargobuvttadeami- ja juogadan ovttasbargojuoibmin Álgoálbmot filbmadahkkiide miehtá Árktalaš guovllu.

• Álgoálbmot Filbmakonferánsa oktavuođas mii cealkit min čanastumi ásahit álgoálbmogiidda Árktalaš guovllus eanet formála filbmaskuvlen ja -oahppo vejolašvuođaid "Stories from the Ice"-prošeavtta olis, áigumuššan olahit ruđalaš ovdáneami ja laihit bargovejolašvuođaid min guovlluin.

• Álgoálbmot Filbmakonferánsa oktavuođas mii cealkit min čanastumi bargat Davviriikkalaš ulbmiliin sámi filmmaid hárrái, ovttasbarggus juo ásahuvvon filbma ruhtadaninstitašuvnnaiguin ja Davviriikkaid ráđđehusaiguin.

• Álgoálbmot Filbmakonferánsa oktavuođas mii cealkit min čanastumi gávdnat vugiid buktit min fálaldaga lágabui gehččiid ođđa juogadankanálaid bokte nugo sapmifilm.com.

• Álgoálbmot Filbmakonferánsa oktavuođas mii cealkit min čanastumi sudjet iežamet ja guđet guimmiideamet álgoálbmot historjjáid boastto ovdanbuktimiin filbmadahkkiid bealis geat eai leat álgoálbmogat.

Mii giittit oappát, vieljat, oasseváldit, guossit ja veahkit jagi 2018 Álgoálbmot Filbmakonferánsas mii lágiduvvui Guovdageainnus.

Govat: Ulannaq Ingemann

Sosiála mediat

SEARVVA DON GE SÁMI FILBMA RÁVDNJEMII WWW.SAPMIFILM.COM