+

Neaktinkursafálaldat sámenuoraide

Suoidnemánu 7.-8. beivviid lágiduvvo Romssas nu gohčoduvvon Chubbuck neaktinkursa, mii lea oaivvilduvvon 16-26-jahkasaš nuoraide. Neavttár Ingá Márjá Sarre álggaha davvisámegielat neaktinkursafálaldaga, man olis lágiduvvojit kursat iešguđet sajiin Sámis jagi 2018.

Ingá Márjá Sarre lea čađahan Chubbuck coach oahpu Ivana Chubbuck Studios Los Angelesas diibmá geasi. Chubbuck lea dovddus neaktin hárjeheaddji Hollywoodas. Kursa lea huksejuvvon Ivana Chubbuck 12 oasásaš neavttár hárjehallama vuođul ja mihttu kurssas lea oahpahit, movttiidahttit ja addit buori vuođu Sámi filbmaneavttáriidda. Teknihkas beasat dutkat mo peršovnnálaš eallinvásáhusain sáhttá hábmet čiekŋalis ja vuđolaš rollakaraktera.

Kursa lea nuvttá ja lágiduvvo ovttasbarggus Internašunála Sámi Filbmainstituhttain.

Lassedieđut ja almmuhanskovvi:

Govva: Nick Lyon

Sosiála mediat

SEARVVA DON GE SÁMI FILBMA RÁVDNJEMII WWW.SAPMIFILM.COM